أنا والله مكسوف ومش عارف أكلمك بانهى وش ؟!! مش عارف حتى ان كنتى فهمانى ولا بتلومى عليه زى التانيين .. بس انا جايلك أبوس ترابك وأقولك سامحينى بجد ... وصدقينى والله انا مليش ذنب واتاخدت فى الرجلين ...صدقينى ياأمى انتى حبك فى قلبى ولما ثورت واتظاهرت كان كل همى انتى .. أرجوكى متعيطيش وكمان متلومنيش ... ما أنا أصلى زى زيك ضحيه كل ذنبى انى مش لاقى اللى ليه .. عارفه يا اما أنا استنيت كتير وياما حلمت بالتغيير ... عارفه !! من وأنا صغير بقول مسيرنا نتغير ... لا عمرى لومت ولا اشتكيت ولا حتى قلت انى عانيت ... عارفه ليه بقولك كلامى ده دلوقتى وليه انتى اللى بوصلك رسالتى ؟!! .. عشان انتى بس اللى ليه واللى حاسه بيا ولو صرخت بعلو صوتى وقلت آآآآآآه مش هلاقى غيرك انتى بس يشد على ايديا ....ياأمى أرجوكى سامحينى .... ما أنا أصلى نفسى أعيش عيشة البنى آدمين ... مش عايز بكره أقوم الاقى نفسى مدفون ... متستغربيش ... آه مدفون وانا لسه عايش ..آه مدفون ولاحد بيا حاسس ... أرجوكى متزعليش ... أنا آه طالبت بالتغيير وربنا كرمنى وحققت الكتير ...ومن دلوقتى وحياتك عندى لاأصونك .. ولا عمرى هسمح لحد يخونك ... بس ضمينى خدينى فى حضنك .. أرجوكى متكونيش أسيه على ابنك ....أنا جايلك مسلم وعايز أكمل فرحتى وانتى راضيه عنى ...متسبيش حد يدخل ما بينا وينهى اللى بينا ... ده أنا مهما كنت برده اسمى ابنك اللى وعد منه هيصون كرامتك ... بحبك يا أمى يا أغلى من عمرى عندى ...بحبك وبقولك متدمعيش ده ماعاش ولا كان اللى ميصونكيش ... وصدقينى بقى فى آخر كلام هقولهولك بكره خلاص يا أمى مبقاش بعيد ... معلش أنا عارف انى تعبتك وخنقتك ويمكن كمان شيلتك اكتر من طاقتك ..بس المره دى انا مبقيتش خلاص بتاع كلام ... المره دى صدقينى انا مش هعمل أى حاجه غير انى أصون كرامتك
ليست هناك تعليقات:
إرسال تعليق